- 185 -

1352. März 11. Liegnitz.

Herzog Wenzel bekennt, dass ihm die Rathleute und Bürger zu Liegnitz 125 Mark Gr. seiner Schuld an die breslauer Bürger Nykel von Crakow und Tilke Rote zu zahlen gelobt, auch an eben dieselben einen Theil der ihnen von ihm für 1200 Mark versetzten Einkünfte abgetreten haben, wofür er ihnen ausser den Bergwerken, bestehenden und noch anzulegenden, sein Marktrecht und Geschoss zu Niclasdorf und den Forst zu Kotzenau etc. versetzt.

Wir Wenceslaus von gotis gnaden der erste herczoge in Slesien vnd herre czu Legnicz bekennen offinbar an dysem briue allen den, vor den her wirt gelesen, daz vnse liben vnse getruwen ratlüte vnd burger czu Legnicz haben vns getruwelichen gevolget vnd by gestanden czu vnsir notdurft vnd haben gelobt hundirt vnd fumfvndczwenczig mark groschen rechtes erbliches vnd ierliches czinses den erlichen lüten Nykil von Crakow und Tilken Roten, dy burger sint czu Breczlaw vnd irn geerben, alzo, daz sy sullen an tretin von sente Michels tage, der nu neste kumt obir dri iar, vnd sollen den czins leysten vnd geben. Ouch haben dy selben unse getruwen burger durch vnsen willen von vnsir vrbor czu Nyclosdorf vnd andirswo in vnsem lande, dy in ouch vor gar vorschreben ist vor czwelfhundirt mark eyner ganczen schicht abe getretin Nykil von Crakow vnd Tilken Roten alzo, daz sy sullen mit vnsen burgern an treten von sente Mertyns tage, der neste kvmt obir czwey iar, vnd sullen von der eynen schicht heben vnd nemen czwelfte halp hundirt mark vnd wo sy der vor sente Michels tage, der do nach der neste wirt, nicht geheben adir genemen mochten von der schicht, was denne gebrichet an den czwelftehalp hundirt marken, daz sullen in vnse burger, dy czu der czyt ratlute sint czu Legnicz, vorczinsen noch der marke czale; vnd dor vmme habe wir gelobet vnsen liben getruwen burgern, daz wir sy alle der gelobde losen wollen vnd entwerren gutlichen ane schaden vnd haben in dor vor vorsaczt vnd bewyset alle vnse vrbor czu Nyclosdorf, czu Wandros, czu Strachwicz vnd obir al in vnsem lande, wo bergwerk wurde mit alle deme, daz dor czu gehoret, alze wir sy pflegen czu haben vnd czu vormitene, ab wir sy selbe ynne hetten nicht vz czu nemene. Wir haben in ouch vorsaczt do vor vnse marktrecht czu Nyclosdorf vnd vnse muncze beyde goldine vnd silberin vnd by namen vnse geschoz czu Nyclosdorf vnd vnsen vorst czu Koczenow uf der heyde vud alles daz gelt, daz vns von czinse von vnsen juden czu Legnicz mak geuallen vnd dar czu wenen wir vnse burger von Legnicz gelosen mogen der hundirt marke geldes czu Rychil vnd czu Hanke Sachsen czu Breczlaw, so sullen dy burger dy lantvoytyge vnd den czol czu Legnicz inne haben alze lange, biz daz wir sy geledigen der hundirt vnd fumfvndczwenczig mark czinses keyn Nykil von Crakow vnd Tilken Roten, alze vor ist geschreben, vnd des, czinses sullen sy sich by namen dirholn an der vrbor vnd an welchir stat es andirs gevile, so sullen dy andirn gelobde abegen vnd nicht nie craft haben, vnd dirre brif sal doch vnschedelich sin vnsen liben burgern an dem briue do in vor mitte czwelf hundirt mark uf der vrbor sint vorschreben; vnd der rede czu gedenkene, habe wir dysen brif geheysen schriben vnd vorsigiln mit vnsem ingesigil vnd ist geschen czu Legnicz an der nesten mittewochen noch sente Gregorij tage, noch gotis geburt tusunt. vnd drihundirt iar in dem czwey vnd fumfczegisten iare.

O. d. St. L. Nr. 78. Das Siegel ist verloren.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866